بقلم
مش بعيد عاللى خلق
ولا كبيرة على قدرته
بأمره البحر اتفلق
وليكى رمى رحمته
ورجعتى تنورى تانى
كبيرة مشمولة بمحبته
مش كتير على ربنا
اللى بأمره العصا تتحول
انه يرجع لينا ضحكنا
ونرجع تانى كما الاول
والسماح يسكن قلوبنا
قبل ما الخوف فينا يتغول
من قبل يوسف نبينا
شفنا سنين عجاف
لكن يوم ما جوعنا
ربنا بفضله حامينا
والخير مالى الضفاف
ولا بانت لحد دموعنا
يا مصر يا ام الصبايا
والرجالة العفيانين
فيكى كنوز وخبايا
للزمن متشالين
داللى جار عليكى اتكسر
يا ام الحنان يا مهد البشر
رجعتى لينا زى القمر
منورة تروى العطشانين
مركبك راح تبحر
مهما الصوارى
تكون مكسورة
راح نشد الحبال
ومركبك تسافر
فى ابهى صورة
ما تخافيش من الغربان
دقلوبهم من رجعتك مقهورة
خوفنا كان عليكى تتوهى
والقلوب فى حبها معذورة
راح نكسر جناين الشوك
والزهور بين الصحارى مبدورة
ارجعى من كبوتك
ولا يهمك ضعف النفوس
ورجعى تانى ضحكتك
واكسرى اقوى الفئوس
ولملمى جراح جتتك
واعلى على كل الروس
داللى خانك يا مصر مرة
راح يزحف ورجلك يبوس
يتمنى الرضا لو دقيقة
يا بلدى دى الحقيقة
ناسك جميلة وبريئة
مهما شربنا من المر كئوس
لابد يوم تنتهى الرحلة
ومعاكى وبيكى تانى نقوى
ونعدى الصعب فى اى محنة
والقلوب يملاها خوف وتقوى
وتعودى لينا يا مصر كبيرة
وننسى اللى خانك من العشيرة
راح نمحى ليهم اى سيرة
ونمحى منك كل اللصوص
تعليقات